ବଲିଉଡ୍ରେ ଆମିର ଖାନ୍ଙ୍କୁ ‘ମିଷ୍ଟର ପରଫେକ୍ସନିଷ୍ଟ’ କୁହାଯାଏ। ଆମିର ବଲିଉଡ୍ର ଏପରି ଜଣେ ତାରକା, ଯିଏ ଦୀର୍ଘ ବର୍ଷ ଧରି ନିଜ ଅଭିନୟ ଜରିଆରେ ଦର୍ଶକଙ୍କ ହୃଦୟରେ ରାଜ୍ କରୁଛନ୍ତି। ନିକଟରେ ସେ ନିଜର ୫୭ତମ ଜନ୍ମଦିନ ପାଳନ କରିଥିଲେ। ଆମିର ଖାନ୍ ନିଜ କ୍ୟାରିୟରରେ ଅନେକ ସୁପରହିଟ୍ ଫିଲ୍ମ ଦେଇଛନ୍ତି। ଅଭିନୟ ବ୍ୟତୀତ ତାଙ୍କ ସୃଜନଶୀଳ ଚିନ୍ତାଧାରା ପାଇଁ ମଧ୍ୟ ସେ ବେଶ୍ ଜଣାଶୁଣା। କିନ୍ତୁ ଆପଣ ଜାଣନ୍ତି କି, ଏକ ସମୟରେ ଆମିର ଫିଲ୍ମ ଓ ଅଭିନୟ ଛାଡ଼ିବାକୁ ମନସ୍ଥ କରିଥିଲେ? ଆଶ୍ଚର୍ଯ୍ୟ ଲାଗିଲା ନା! କିନ୍ତୁ ଏହା ସତ। ଆମିର ଖାନ୍ ନିଜେ ଏକ ସାକ୍ଷାତକାର ସମୟରେ ଏହାର ଖୁଲାସା କରିଛନ୍ତି।
ଆମିର ଖାନ୍ କହିଥିଲେ, “କରୋନା ମହାମାରୀ ସମୟରେ ମୁଁ ଅନୁଭବ କଲି ଯେ ମୁଁ କେବେ ନିଜ ପରିବାରକୁ ସମୟ ଦେଇପାରିନାହିଁ। ଯେତେବେଳେ ମୁଁ ଅଭିନେତା ହେଲି, ସେତେବେଳେ ଭାବିଥିଲି ଯେ ମୋ ପରିବାର ସବୁବେଳେ ମୋ ସହିତ ଅଛି। କିନ୍ତୁ ଏହାପରେ ମୁଁ ବିଶେଷ କରି ନିଜ ପିଲାମାନଙ୍କୁ ସମୟ ଦେଇପାରିଲି ନାହିଁ। ମୁଁ ଧୀରେ ଧୀରେ ସ୍ୱାର୍ଥପର ହେବାକୁ ଲାଗିଥିଲି।”
ଆମିର ଆହୁରି କହିଥିଲେ, “ଯେତେବେଳେ ଆପଣ କୌଣସି କାମ ଆରମ୍ଭ କରନ୍ତି, ସେତେବେଳେ ଅନେକ କଠିନ ପରିଶ୍ରମ କରିବାକୁ ପଡ଼େ। ମୁଁ ପ୍ରାୟ ୩୫ ବର୍ଷ ଧରି ଏହିପରି କାମ କରିଆସୁଥିଲି। ସେହି ସମୟରେ ମୁଁ କେବଳ ନିଜ ବିଷୟରେ ହିଁ ଚିନ୍ତା କରୁଥିଲି।”
ଆମିର ଖାନ୍ କହିଥିଲେ ଯେ ୫୭ ବର୍ଷ ବୟସରେ ତାଙ୍କୁ ଏହି କଥା ଅନୁଭବ ହୋଇଥିଲା। ସେ ଜଣାଇଥିଲେ, “ମୁଁ ମୋ ପରିବାରକୁ କହିଥିଲି ଯେ ମୁଁ ଅଭିନୟ ସମ୍ପୂର୍ଣ୍ଣ ଭାବେ ଛାଡ଼ିଦେବି ଏବଂ କେବଳ ଫିଲ୍ମ ପ୍ରଯୋଜନା କରିବି।” ତାଙ୍କ ଏହି କଥା ଶୁଣି ପରିବାର ସଦସ୍ୟମାନେ ଆଶ୍ଚର୍ଯ୍ୟ ହୋଇଯାଇଥିଲେ।
ଆମିର କହିଥିଲେ ଯେ ଏହାପରେ ସେ ଭାବିଥିଲେ ଯେ ଏହି କଥା ଲୋକଙ୍କୁ ଜଣାଇବା ଉଚିତ। କିନ୍ତୁ ପରେ ତାଙ୍କୁ ଲାଗିଥିଲା ଯେ ଯଦି ସେ ସେହି ସମୟରେ ଏହା ଘୋଷଣା କରିବେ, ତେବେ ଲୋକେ ଭାବିବେ ଯେ ନିଜ ଫିଲ୍ମ ‘ଲାଲ୍ ସିଂହ ଚଢ଼ା’ର ପ୍ରଚାର ପାଇଁ ସେ ଏପରି କରୁଛନ୍ତି।
ଆମିର ଆଗକୁ କହିଥିଲେ, “ମୁଁ ମନରୁ ଫିଲ୍ମ ଛାଡ଼ିବାର ନିଷ୍ପତ୍ତି ନେଇସାରିଥିଲି। ଏହାପରେ ମୋ ପିଲାମାନେ ଓ ପତ୍ନୀ କିରଣ ମୋତେ ବୁଝାଇଥିଲେ ଯେ ମୁଁ ଭୁଲ୍ କରୁଛି। ମୁଁ ଫିଲ୍ମ ଇଣ୍ଡଷ୍ଟ୍ରି ଛାଡ଼ିଦେଇଥିଲି, ଯଦିଓ ଏବେ ପୁଣି ଫେରିଆସିଛି।”
ଆମିର ଖାନ୍ଙ୍କ ଫିଲ୍ମ ‘ଲାଲ୍ ସିଂହ ଚଢ଼ା’ ଖୁବ୍ ଶୀଘ୍ର ସିନେମା ହଲ୍ରେ ରିଲିଜ୍ ହେବାକୁ ଯାଉଛି। ଏହି ଫିଲ୍ମରେ ତାଙ୍କ ସହ ଅଭିନେତ୍ରୀ କରୀନା କପୁର ମଧ୍ୟ ନଜର ଆସିବେ।
